DINAMO organizou un ciclo de Contacontos pola Igualdade no Concello de Oroso

 Os pasados 24, 25 e 26 de marzo o Concello de Oroso organizou un ciclo de contacontos nos centros de ensino do concello, levando diferentes espectáculos a prol da igualdade, a cargo de Pedro Brandariz.

Os espectáculos escollidos foron "Non Máis Princesas" e Heroes e Heroas", ambos cunha fonda perspectiva de xénero, con historias lúdicas e moi divertidas, encamiñadas á sensibilización na igualdade de xénero e a prevención das violencias machistas.

O 24 de marzo foron tres pases no CEIP Camiño Inglés, o 25 de marzo catro pases nos diferentes CRAs de Oroso, e finalmente o 26 de marzo fixemos 6 pases no CEIP Sigüeiro. Todas as sesións estiveron destinadas ao alumnado de Educación Infantil dos centros.

O número de pases foi tan elevado debido a que se realizou unha sesión por cada grupo-aula, para cumprir os protocolos de hixiene e seguridade esixidos pola actual crise da COVID19.

DINAMO organizou unha Xincana pola Igualdade no CEIP Víctor Sáenz (Mazaricos)

O pasado 8 de marzo a equipa educativa de DINAMO organizou unha xincan pola igualdade en Mazaricos, máis concretamente no CEIP Víctor Sáenz. Nesta actividade participaron todas as alumnas e alumnos de Educación Infantil e Primaria do centro.

As cativas e cativos pasaron unha mañá diferente realizando todo tipo de xogos e dinámicas temáticas encamiñadas cara a sensibilización en igualdade de xénero. Dunha maneira lúdica e divertida as pequenas e pequenos traballaron sobre os estereotipos e roles de xénero, os micromachismos, as discriminacións, as violencias machistas... e sobre todo novas formas relacionais baseadas na igualdade e na equidade, novas masculinidades...

Dende DINAMO levamos a cabo todo tipo de actividades en torno á igualdade de xénero e prevención das violencias machistas.

Ademais todas as actividades que realizamos nestes tempos cumpren todos os protocolos hixiénicos e sanitarios esixidos pola actual crise sanitaria da COVID19. Todas as e os participantes e o monitorado utilizan máscaras de protección, trabállase por grupos burbulla e entre cada grupo desinfectase todo o material utilizado. Así mesmo as e os participantes desinféctanse con xel hidroalcólico no comezo e no remate da actividade. 

O Apalpador de DINAMOproducións pasouse ás "videoconferencias" en Cambre

Dende DINAMO levamos moitos anos encargándonos de que O Apalpador do Courel visite as nenas e nenos de Cambre e todos os anos o "carboeiro" fai un percorrido por 14 localizacións do Concello de Cambre. E neste Nadal non faltamos á nosa cita, pero nesta ocasión foi diferente, pois a visita do "Apalpador" foi por video ou streaming. 

Gravamos unha intervención do Apalpador en 14 localizacions diferentes do Concello de Cambre e nos días de Nadal foronse emitindo polas redes sociais do Concello de Cambre.

Este novo formato foi a solución que o persoal técnico municipal e da propia empresa atoparon para manter a programación nas actuais circunstancias derivadas da crise sanitaria da COVID19.

DINAMO organizou a Visita Teatralizada dos Reis Magos en Vimianzo

O pasado 5 de xaneiro a equipa artística de DINAMO organizou unha Visita Teatralizada dos Reis Magos na Casa da Cultura de Vimianzo, creando un espectáculo específico no que se foi interactuando coas nenas e nenos que asistiron, pero a distancia e con todas as medidas de seguridade necesarias.

Fixéronse tres pases do espectáculo de 45 minutos para evitar aglomeracións e que poidesen pasar todas nenas e nenos de Vimianzo e arredores que quixeran.

DINAMO ten equipas especializadas na creación e deseño de espectáculos a medida e específicos, como foi neste caso.

DINAMO organizou un Programa de Contacontos e Obradoiros de Nadal en Camariñas

Os pasados 28 e 29 de outubro a equipa educativa de DINAMO organizou un programa de Contacontos e Obradoiros na Biblioteca de Camariñas.

O primeiro dos días o narrador oral foi Pedro Brandariz que narrou unha escolma de historias de Nadal e despois as nenas e nenos que asistiron ó contacontos tamén poideron participar nun divertido obradoiro vencellado cos contos que escoitaran previamente.

No segundo dos días a narradora foi a Pallasa Tati (Leti Miranda) que tamén contou historias de Nadal. E as nenas e nenos tamén participaron nun segundo obradoiro temático.

Dende DINAMO organizamos todo tipo de actividades lúdicas e escénicas para bibliotecas e outros espazos sociais e educativos.

DINAMO creou un Vídeo Didáctico sobre o Samaín para o Concello de Carral

 No pasado mes de outubro a equipa educativa e audiovisual de DINAMO produciron un vídeo didáctico sobre o Samaín para o Concello de Carral.

Neste vídeo a educadora Laura Barreiros amósalle ás nenas e nenos como decorar a súa cabaza para a Noite de Defuntos, dende o baleirado da mesma ata os últimos detalles e ornamentos, ademáis de falar da tradición dos calacús ou cabazas, do Samaín e da Noite de Difuntos, dende o punto de vista antropolóxico.

Este actividade que se tería feito de maneira presencial en condicións normais realizouse a través de vídeo para adaptarse ás medidas derivadas da crise sanitaria da COVID19.

Dende DINAMO producimos todo tipo de vídeos didácticos e lúdicos para moi diferentes proxectos sociais, culturais...

DINAMO organiza o Programa Formativo en Consumo da OMIC da Coruña

Dende o pasado mes de setembro a equipa educativa de DINAMO encárgase da xestión e a execución do Programa Formativo en Consumo da Oficina Municipal de Información ás Persoas Consumidoras.

Un gran parte deste programa formativo corresponde ós centos de charlas, obradoiros e outras actividades dirixidas ós centros educativos do Concello da Coruña e que se enmarcan dentro do Programa "Coruña Educa".

Durante todo o curso escolar a equipa educativa de DINAMO visita os diferentes centros educativos con todo tipo de propostas e iniciativas arredor do consumo consciente e responsable e dos dereitoas das persoas consumidoras.

Ademáis tamén se realizan actividades para centros cívicos, entidades sociais e veciñais... así como na propia OMIC (aínda que adaptándose ás circunstancias derivadas da crise sanitaria da COVID).